কৃষি আইন প্ৰতিবাদী কৃষক ছহিদলৈ দেশজুৰি শ্ৰদ্ধাঞ্জলি কংগ্ৰেছ দলৰ ৷ প্ৰায় সাতশ কৃষক ছহিদৰ ত্যাগৰ চৰম পৰিণতিৰ বাবে নৰেন্দ্ৰ মোদী সাজু হওক -শ্ল’গানেৰে ৰাজ্যজোৰা বিজয় উৎসৱ পালন কৰিলে ৰাজ্যৰ বিৰোধী দলটোৱে ৷ বিতৰ্কিত কৃষি আইন তিলিখন প্ৰধানমন্ত্ৰী নৰেন্দ্ৰ মোদীয়ে অৱশেষত বাতিল কৰিবলৈ বাধ্য হোৱা ঘটনাক আপোচবিহীন কৃষক সমাজ আৰু গণতান্ত্ৰিক শক্তিসমূহৰ এক ঐতিহাসিক বিজয় বুলি অভিহিত কৰিছে কংগ্ৰেছে ৷
প্ৰদেশ কংগ্ৰেছৰ সভাপতি ভূপেন বৰাই তিতাবৰ-গোলাঘাটত, দেৱব্ৰত শইকীয়াই গুৱাহাটীত, প্ৰদ্যুৎ বৰদলৈয়ে মৰিগাঁৱত কৃষক ছহিদলৈ জনালে শ্ৰদ্ধাঞ্জলি ৷
গুৱাহাটীতো বিয়লি কংগ্ৰেছৰ মুখ্য কাৰ্যালয় ৰাজীৱ ভৱনত কৃষক আন্দোলনৰ ছহিদ সকলৰ স্মৰণত শ্ৰদ্ধাঞ্জলি জ্ঞাপন কৰা হয় আৰু হাতে হাতে প্ৰজ্জ্বলিত মমবাতি লৈ স্থানীয়ভাৱে এক সমদল বাহিৰ কৰা হয় ৷ অসম বিধান সভাৰ বিৰোধী দলপতি শ্ৰীদেৱব্ৰত শইকীয়া, উপ-দলপতি শ্ৰীৰকিবুল হুছেইন আদিৰ বহু নেতা-কৰ্মীয়ে অংশগ্ৰহণ কৰে ৷
কাৰ্বি আংলঙ, ডিব্ৰুগড়, তিনিচুকীয়া, যোৰহাট, ধুবুৰী, বঙাইগাওঁ, ধেমাজি, লক্ষীমপুৰ, শোণিতপুৰ, দৰং, বৰপেটা, নলবাৰী, নগাওঁ, গোৱালপাৰা বিশ্বনাথ আদি ৰাজ্যখনৰ প্ৰায় সকলো জিলাতে কংগ্ৰেছৰ উদ্যোগত ‘কৃষক বিজয় দিৱস’ উদযাপন কৰা হয়।
