পশ্চিমবংগৰ মুখ্যমন্ত্ৰী মমতা বেনাৰ্জীয়ে আজি প্ৰধানমন্ত্ৰী নৰেন্দ্ৰ মোডীক সাক্ষাৎ কৰিব। মমতা বেনাৰ্জী তেওঁৰ চাৰিদিনীয়া ভ্ৰমণসূচীৰে নতুন দিল্লীত আছে।
তেওঁ সীমান্ত সুৰক্ষা বাহিনী (বিএছএফ) আৰু ৰাজ্যখনৰ উন্নয়ন সম্পৰ্কে প্ৰধানমন্ত্ৰীৰ লগত আলোচনা কৰিব।
পশ্চিমবংগ বিধানসভা নিৰ্বাচনৰ পিছত এই ভ্ৰমণটো তৃণমূল অধ্যক্ষগৰাকীৰ দিল্লীলৈ দ্বিতীয় ভ্ৰমণ। মমতাৰ দলে যোৱা নিৰ্বাচনত ভাৰতীয় জনতা পাৰ্টিৰ বিপৰীতে বিজয় লাভ কৰিছিল।
দিল্লীলৈ ৰাওনা হোৱাৰ পূৰ্বে মমতাই কয়, “মই আজি দিল্লীলৈ গৈ আছোঁ কাৰণ পশ্চিম বংগ সম্পৰ্কীয় বি এছ এফৰ বিষয় আৰু অন্যান্য উন্নয়নমূলক বিষয়ত প্ৰধানমন্ত্ৰীৰ সৈতে মোৰ এপইণ্টমেণ্ট আছে।”
তদুপৰি, তেওঁ ভাৰতীয় জনতা পাৰ্টিক সহায় কৰিবলৈ কেন্দ্ৰীয় বাহিনী প্ৰয়োগ কৰাৰ বাবে কেন্দ্ৰীয় চৰকাৰক সমালোচনা কৰে।
শেহতীয়াকৈ, কেন্দ্ৰীয় গৃহ মন্ত্ৰালয়ে বিএছএফৰ অধিকাৰ ক্ষেত্ৰৰ ওপৰত এক জাননী জাৰি কৰিছে। জাননীখনত উল্লেখ কৰা হৈছে যে সীমান্তত বিএছএফৰ অধিকাৰ ক্ষেত্ৰ ১৫ কিলোমিটাৰৰ পৰা ৫০ কিলোমিটাৰলৈ প্ৰসাৰিত কৰাটো কেন্দ্ৰ আৰু ৰাজ্য চৰকাৰৰ মাজত এটা সমস্যা হিচাপে দেখা দিছে।
