দিল্লীৰ ঐতিহাসিক কৃষক আন্দোলনৰ ১ বছৰ সম্পূৰ্ণ ৷ হাজাৰ হাজাৰ কৃষকৰ আজি দিল্লী অভিমুখে যাত্ৰা ৷
আজি ২৬ নৱেম্বৰ, দিল্লীৰ কৃষক আন্দোলনে ১ বছৰ সম্পূৰ্ণ কৰিলে । কৃষি আইন প্ৰত্যাহাৰৰ দাবী চৰকাৰে মানি লৈছে যদিও কৃষকসকলে এতিয়ালৈকে আন্দোলন প্ৰত্যাহাৰ কৰা নাই। আজি এই আন্দোলনৰ এবছৰ হোৱাৰ উপলক্ষে আন্দোলনকাৰী কৃষকসকলে সমগ্ৰ দেশতে এক বৃহৎ কাৰ্যসূচীৰ পৰিকল্পনা কৰিছে। কৃষক আন্দোলনৰ কথা মনত ৰাখি ৰাজধানী দিল্লীত ইতিমধ্যে নিৰাপত্তা বৃদ্ধি কৰা হৈছে। দিল্লী আৰক্ষীয়ে জনাইছে যে বৃহস্পতিবাৰৰ পৰা দিল্লীৰ তিনিটা সীমান্ত অৰ্থাৎ সিংঘু, টিক্ৰি আৰু গাজীপুৰত কঠোৰ নিৰাপত্তা ব্যৱস্থা কৰা হৈছে। বিশৃংখল পৰিস্থিতি পৰিহাৰ কৰিবলৈ অতিৰিক্ত আৰক্ষী বাহিনীও মোতায়েন কৰা হৈছে। চহৰখনৰ বিভিন্ন গুৰুত্বপূৰ্ণ স্থান আৰু মেট্ৰ’ ষ্টেচনত নিৰাপত্তা বৃদ্ধি কৰা হৈছে। ইউনাইটেড কিষাণ মৰ্চাৰ দ্বাৰা জাৰী কৰা এক বিবৃতিয়ে তেওঁলোকক কেইবাটাও কাৰ্যসূচীৰ বিষয়ে অৱগত কৰিছে। কৃষক সন্থাৰ বিবৃতিত কোৱা হৈছে, “যোৱা ১২ মাহ ধৰি সমগ্ৰ দেশৰ আটাইতকৈ দীঘল আৰু সৰ্ববৃহৎ আন্দোলনটো বিশ্বৰ ইতিহাসত লিখা হ’ব। আন্দোলন কেৱল দেশৰ সীমাতে সীমাবদ্ধ নহয়, বিশ্বৰ বিভিন্ন প্ৰান্তৰ মানুহেও তেওঁলোকৰ সমৰ্থন ব্যক্ত কৰিছে। প্ৰতিখন ৰাজ্য, প্ৰতিখন জিলা আৰু প্ৰতিখন গাঁৱলৈ বিয়পি পৰা এই আন্দোলনত কোটি কোটি লোকে অংশগ্ৰহণ কৰিছে। ‘ ইউনাইটেড কিষাণ মৰ্চাই আহ্বান কৰা কৃষক আন্দোলনৰ বাৰ্ষিকী উপলক্ষে আজি দিল্লীত এক বৃহৎ আন্দোলনৰ পৰিকল্পনা কৰা হৈছে। বিভিন্ন জিলাৰ কৃষকসকলেও আন্দোলনত যোগদান কৰিব। দিল্লীৰ চাৰিওফালৰ ৰাজ্যসমূহৰ পৰা হাজাৰ হাজাৰ কৃষক দিল্লীলৈ আহিবলৈ আৰম্ভ কৰিছে।
