ওমিক্ৰনৰ আতংকৰ মাজতে মোডীক সাক্ষাৎ কৰিবলৈ ভাৰতত উপস্থিত হৈছে ৰাছিয়াৰ ৰাষ্ট্ৰপতি ভ্লাদিমিৰ পুটিন। সোমবাৰে ওমিক্ৰন আতংকৰ মাজতে ভাৰত ভ্ৰমণ কৰিছে তেওঁ । দ্বিপাক্ষিক সম্পৰ্ক অধিক শক্তিশালী কৰাৰ বাবে ভাৰত-ৰাছিয়া সন্মিলনত তেওঁ প্ৰধানমন্ত্ৰী নৰেন্দ্ৰ মোদীৰ সৈতে আলোচনা কৰিব। ৰাছিয়াৰ বৈদেশিক মন্ত্ৰী ছেৰ্গেই লাভৰভ ইতিমধ্যে দিল্লীৰ পালম বিমানবন্দৰত বৈঠকত অংশগ্ৰহণ কৰিবলৈ উপস্থিত হৈছে। ২০১৯ চনৰ নৱেম্বৰত ব্ৰাচিলিয়াত ব্ৰিকছ সন্মিলনৰ পিছত মোডী আৰু পুটিন প্ৰথমবাৰৰ বাবে মিলিত হ’বলৈ সাজু হৈছে। ৰাছিয়াৰ ৰাষ্ট্ৰপতিয়ে কৰোনাৰ নতুন চাপ ওমিক্ৰন সংক্ৰমণৰ মাজতো এই ভ্ৰমণ বাতিল কৰা নাছিল, যি ইয়াকে সূচায় যে দুয়োখন দেশৰ মাজৰ সম্পৰ্ক যথেষ্ট শক্তিশালী। জানিব পৰা মতে সন্মিলনখনত দুয়োখন দেশৰ মাজত কেইবাটাও বিষয় আলোচনা কৰা হ’ব। দুয়োখন দেশৰ মাজত প্ৰযুক্তি আৰু প্ৰতিৰক্ষাকে ধৰি একাধিক চুক্তি হ’ব পাৰে। প্ৰধানমন্ত্ৰী মোদী আৰু ৰাষ্ট্ৰপতি পুটিনে বিশেষকৈ নতুন দিল্লী আৰু মস্কোৰ মাজত কৌশলগত সহযোগিতা আৰু অধিক বৃদ্ধি কৰাৰ বিষয়ে কথা পাতিব।
বাৰ্ষিক সন্মিলনৰ পূৰ্বে দুয়োখন দেশৰ মাজত টু প্লাছ টু পৰ্যায়ৰ বৈদেশিক পৰিক্ৰমা আৰু প্ৰতিৰক্ষা মন্ত্ৰালয়ৰ বৈঠক অনুষ্ঠিত হ’ব। ভাৰতৰ বৈদেশিক মন্ত্ৰী এছ জয়শংকৰে নতুন দিল্লীত ৰাছিয়াৰ বৈদেশিক মন্ত্ৰী ছেৰ্গেই লাভৰভৰ সৈতে আলোচনা কৰিব। একেদৰে, প্ৰতিৰক্ষা মন্ত্ৰী ৰাজনাথ সিঙে ৰাছিয়াৰ প্ৰতিৰক্ষা মন্ত্ৰী ছেৰ্গেই শ্বেইগুক সাক্ষাৎ কৰিব। এক বিবৃতিত বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে কয়, “বৈঠকখনত ৰাজনৈতিক আৰু প্ৰতিৰক্ষা বিষয়সমূহ আলোচনা কৰা হ’ব। “
উল্লেখ্য যে প্ৰধানমন্ত্ৰীৰ সৈতে পুটিনৰ বৈঠকত এছ-৪০০ মিছাইল প্ৰণালী সন্দৰ্ভত আলোচনা হোৱাৰ সম্ভাৱনা আছে। এই মিছাইল প্ৰণালীৰ বিভিন্ন অংশ ইতিমধ্যে ভাৰতত উপলব্ধ হ’বলৈ আৰম্ভ কৰিছে। যাৰ ওপৰত আমেৰিকাই তীব্ৰ আপত্তি দৰ্শাই আহিছে। যদি এই অস্ত্ৰসমূহ ভাৰতীয় সেনাৰ হাতত থাকে, তেন্তে দেশৰ নিৰাপত্তা শক্তিশালী হ’ব বুলি জানিব পৰা গৈছে।
