দেশত ছোৱালীৰ বিবাহৰ বয়স ২১ বছৰ কৰাৰ ব্যৱস্থাৰ পিছত এতিয়া বিবাহৰ বয়স সম্পৰ্কে বিভিন্ন আলোচনা চলি আছে। আৰু এই পৰিস্থিতিৰ মাজতে পঞ্জাৱ আৰু হাৰিয়ানা উচ্চ ন্যায়ালয়ৰ এক পৰ্যৱেক্ষণে ইতিমধ্যে বিতৰ্কৰ সৃষ্টি কৰিছে। আদালতে কৈছে যে, মুছলমান ছোৱালীয়ে সদ্য যৌৱনপ্ৰাপ্ত হোৱা লগে লগেই বিবাহ পাশত আৱদ্ধ হ’ব পাৰে। অৰ্থাৎ, বিয়া কৰিবলৈ ১৮ বছৰীয়া হোৱাৰ কোনো প্ৰয়োজন নাই।
এজন মুছলমান নাবালিকা আৰু এজন হিন্দু যুৱকৰ বিবাহৰ গোচৰৰ নিৰ্ণয় লোৱাৰ সময়ত ন্যায়ালয়ে এইদৰে কয়। উচ্চ ন্যায়ালয়ৰ ন্যায়াধীশে মন্তব্য কৰিছে যে নিয়মটো মুছলিম ব্যক্তিগত আইনত উল্লেখ কৰা আছে।
ঘটনাক্ৰমে, ইছলাম ধৰ্মৰ এগৰাকী ১৭ বছৰীয়া কিশোৰীয়ে এজন হিন্দু প্ৰেমিকক বিয়া কৰাইছে। বিয়াখনত ছোৱালীজনীৰ পৰিয়ালৰ মত নাছিল। ফলস্বৰূপে, তেওঁলোকে দাবী কৰে যে এই বিবাহ সম্পূৰ্ণ অবৈধ। পিছত ছোৱালীজনীয়ে ইয়াৰ বিৰুদ্ধে আদালতত এখন আবেদন দাখিল কৰিছে। সেই অনুসৰি, ন্যায়াধীশ গিলে কয়, “ছোৱালীজনীয়ে পৰিয়ালৰ ইচ্ছাৰ বিপৰীতে বিয়া কৰোৱা অৰ্থ এইটো নহয় যে তেওঁ মৌলিক অধিকাৰৰ পৰা বঞ্চিত হ’ব। আদালতে চকু মুদি থাকিব নোৱাৰে। “
এই সন্দৰ্ভত ন্যায়াধীশে দাবী কৰে যে এই আইনৰ অধীনত, ইছলাম ধৰ্মৰ ছোৱালী কেৱল যৌৱনপ্ৰাপ্ত হ’লেই বিবাহযোগ্য হয়। সেই সময়ত, নিজৰ পচন্দ অনুসৰি দৰাক বিয়া কৰাব পাৰে। গোচৰটো দিয়া ছোৱালীজনীৰ বয়স ১৭ বছৰ। মুছলিম ব্যক্তিগত আইন মতে ছোৱালীজনী বিয়া হোৱাৰ বাবে এয়া যথেষ্ট বয়স। এনে আদালতৰ ৰায় নিঃসন্দেহে গুৰুত্বপূৰ্ণ। কেন্দ্ৰই দেশৰ কন্যাসকলৰ বাবে বিবাহৰ বয়স ২১ বছৰ কৰিবলৈ আইনৰ ব্যৱস্থা কৰাৰ সময়তে ন্যায়াধীশ গৰাকীৰ মন্তব্যই তীব্ৰ জোকাৰণি তুলিছে সমগ্ৰ দেশতে।
