কিছুদিন পুৰ্বে প্ৰাক্তন প্ৰধানমন্ত্ৰী অটল বিহাৰী বাজপেয়ীৰ জন্ম দিৱস উপলক্ষে অনুষ্ঠিত সুশাসন দিৱসৰ অনুষ্ঠানত মুখ্যমন্ত্ৰী ডঃ হিমন্ত বিশ্ব শৰ্মাই ব্যক্তিগত দেহৰক্ষী পৰিত্যাগ কৰিবলৈ আহ্বান জনাইছিল বিজেপিৰ নেতা-কৰ্মীক । PSO কংগ্ৰেছৰহে সংস্কৃতি বুলি মন্তব্য কৰিছিল মুখ্যমন্ত্ৰীয়ে ।
মুখ্যমন্ত্ৰীৰ এই আহ্বানক তীব্ৰ কটাক্ষ কংগ্ৰেছৰ বিধায়ক কমলাক্ষ দেৱ পুৰকায়স্থৰ । বিধায়ক পুৰকায়স্থৰ প্ৰশ্ন প্ৰাক্তন মুখ্যমন্ত্ৰী সৰ্বানন্দ সোণোৱালৰ মুখ্যমন্ত্ৰীত্বৰ কালত যেতিয়া ডঃ হিমন্ত বিশ্ব শৰ্মাই Z কেটেগৰি নিৰাপত্তা লাভ কৰিছিল, তেতিয়া কিয় নিশ্চুপ আছিল ডঃ হিমন্ত বিশ্ব শৰ্মা ? সেইসময়ত কেন্দ্ৰীয় গৃহমন্ত্ৰীক অনুৰোধ কৰি তেওঁ Z কেটেগৰিৰ নিৰাপত্তা লৈছিল , তেতিয়া সেই সংস্কৃতি ক’ত গৈছিল ?
TRPৰ কাৰণে ৰাজনীতি কৰে বৰ্তমানৰ মুখ্যমন্ত্ৰী ডঃ হিমন্ত বিশ্ব শৰ্মাই । এই মন্তব্য কংগ্ৰেছ বিধায়ক কমলাক্ষ দেৱ পুৰকায়স্থৰ । চৰকাৰ তথা মুখ্যমন্ত্ৰীলৈ আহ্বান, বিকল হৈ পৰা উদ্যোগ সমুহ পৰিদৰ্শন কৰক , নিবনুৱা যুৱক-যুৱতীৰ মনৰ খবৰ লওক । কোনে কি কৰিছে , কোনে PSO লৈছে , এইবোৰ খবৰ মুখ্যমন্ত্ৰীয়ে নলয় । যদি PSO বিযয়টোৱে আমনি কৰিছে , তেন্তে মুখ্যমন্ত্ৰীয়ে এক নিৰ্দেশ জাৰি কৰক বিজেপি কোনো নেতা-কৰ্মীয়ে PSO ল’ব নেলাগে বুলি । মুখ্যমন্ত্ৰীৰ মুখত এনে মন্তব্যই শোভা নেপায় ।