আমেৰিকা যুক্তৰাষ্ট্ৰৰ কেন্দ্ৰীয় চোৰাংচোৱা সংস্থা, চিআইএ-য়ে গোপনে ইউক্ৰেইনৰ সৈন্যসকলক ৰাছিয়াৰ বিৰুদ্ধে যুঁজিবলৈ তেওঁলোকৰ সামৰিক সামৰ্থ্য বৃদ্ধি কৰিবলৈ প্ৰশিক্ষণ দি আছে।
প্ৰতিবেদন অনুসৰি, ইউক্ৰেইনৰ বিশেষ অভিযানত সৈন্যসকলক এই প্ৰশিক্ষণৰ অধীনলৈ অনা হৈছে। ইউক্ৰেইনৰ চোৰাংচোৱা সদস্যসকলকো প্ৰশিক্ষণ দিয়া হৈছে।
এই প্ৰক্ৰিয়াৰ সৈতে জড়িত পাঁচজন প্ৰাক্তন আমেৰিকা যুক্তৰাষ্ট্ৰৰ চোৰাংচোৱা আৰু ৰাষ্ট্ৰীয় নিৰাপত্তা বিষয়াৰ মতে, আমেৰিকা যুক্তৰাষ্ট্ৰৰ দক্ষিণ অংশৰ এটা গোপন ঘাটিত ২০১৫ চনৰ পৰা আমেৰিকা যুক্তৰাষ্ট্ৰই প্ৰশিক্ষণ কাৰ্যসূচী আৰম্ভ কৰিছে।
ইউক্ৰেইনৰ প্ৰাক্তন বিষয়া এজনে ৰাজহুৱা কৰিছে যে প্ৰশিক্ষণ কাৰ্যসূচীয়ে আমাক ৰাছিয়ান সৈন্যক কেনেদৰে হত্যা কৰিব লাগে শিকাইছে। তেওঁ কয় যে যদি ৰাছিয়াই ইউক্ৰেইন আক্ৰমণ কৰে, তেন্তে এই প্ৰশিক্ষিত লোকসকলে তাত গেৰিলা কমাণ্ডাৰ হিচাপে কাম কৰিব।
আমি যোৱা আঠ বছৰ ধৰি এই লোকসকলক প্ৰশিক্ষণ দি আহিছো, চিআইএৰ প্ৰাক্তন বিষয়াজনে এইদৰে কয়। তেওঁলোক সঁচাকৈয়ে ভাল যোদ্ধা হৈ পৰিছে। ইউক্ৰেইনত ৰাছিয়াৰ আক্ৰমণে চিআইএৰ কাৰ্যসূচীত যথেষ্ট প্ৰভাৱ পেলাব।
চিআইএৰ প্ৰাক্তন বিষয়াজনে কৈছে যে প্ৰশিক্ষণে ইউক্ৰেইনৰ বিশেষ গোটৰ সদস্যসকলক অধিক দক্ষ আৰু যোগ্য কৰি তুলিছে আৰু ৰাছিয়াৰ সৈন্যসকলক পিছুৱাই নিয়াৰ সামৰ্থ্য লাভ কৰিব। চিআইএৰ প্ৰশিক্ষণ কাৰ্যসূচীৰ অধীনত ইউক্ৰেইনৰ সৈন্যৰ চোৰাংচোৱা ক্ষমতা বৃদ্ধি কৰাৰ প্ৰচেষ্টা কৰা হৈছে।
