ইউক্ৰেইনত হোৱা আক্ৰমণৰ বিৰুদ্ধে সমগ্ৰ ৰাছিয়াত ব্যাপক প্ৰতিবাদ হৈছে। প্ৰতিবাদৰ সময়ত ৰাছিয়াৰ আৰক্ষীয়ে ৯০০ ৰো অধিক লোকক গ্ৰেপ্তাৰ কৰিছিল।
যুদ্ধ বিৰোধী প্ৰতিবাদৰ উপৰিও বিৰোধী ৰাজনীতিবিদ বৰিছ নেমৎছভৰ হত্যাৰ সপ্তম বাৰ্ষিকী উপলক্ষে ৰাছিয়াৰ ৪৪ খন চহৰত এই প্ৰতিবাদ অনুষ্ঠিত হৈছে।
ইউক্ৰেইনে কোনো পূৰ্ব চৰ্ত অবিহনে ৰাছিয়াৰ প্ৰতিনিধি দলক লগ কৰিবলৈ ইচ্ছুক। ইউক্ৰেইনৰ উপ অভ্যন্তৰীণ মন্ত্ৰী য়েভগেনি য়েনিনে কৈছে যে বৈঠকখন স্থানীয় সময় অনুসৰি সোমবাৰে পুৱা বেলাৰুছ-ইউক্ৰেইন সীমান্তত অনুষ্ঠিত হ’ব।
ইয়াৰ পূৰ্বে ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে বেলাৰুছৰ ৰাষ্ট্ৰপতি আলেকজেণ্ডাৰ লুকাচেঙ্কোৰ সৈতে কথা পতাৰ পিছত এক বিবৃতিযোগে বৈঠকখন নিশ্চিত কৰে।
ইফালে, ইউক্ৰেইনত ৰাছিয়াৰ সামৰিক অভিযানৰ চতুৰ্থ দিন দেওবাৰে অব্যাহত আছে। ৰাছিয়াৰ বাহিনীয়ে ইউক্ৰেইনৰ চহৰসমূহত আক্ৰমণ কৰি আছে। ইউক্ৰেইনৰ বাহিনীয়েও প্ৰতিৰোধ ইতিমধ্যে গঢ়ি তুলিছে।