ত্ৰিপুৰাৰ মুখ্যমন্ত্ৰী বিপ্লব কুমাৰ দেৱে শনিবাৰে তেওঁৰ পদৰ পৰা পদত্যাগ কৰিছিল। তেওঁ ৰাজ্যপাল সত্যদেৱ নাৰায়ণ আৰ্যৰ ওচৰত পদত্যাগ পত্ৰ দাখিল কৰিছিল। ৰাজ্যখনত অহা বছৰৰ আৰম্ভণিতে নিৰ্বাচন অনুষ্ঠিত হ’বলৈ সাজু হৈছে। শনিবাৰে পদত্যাগৰ পিছত বিপ্লব দেৱে কয়, “আমি ত্ৰিপুৰাত বিজেপিক দীৰ্ঘদিন ধৰি শাসনত ৰাখিব লাগিব।”
তেওঁ লগতে কয়, “দল সকলোতকৈ ওপৰৰ। মই প্ৰধানমন্ত্ৰী মোডীৰ নেতৃত্ব আৰু নিৰ্দেশনাত দলটোৰ হৈ কাম কৰিছো। মই ত্ৰিপুৰাৰ জনসাধাৰণক দলৰ ৰাজ্যিক গোটৰ মুৰব্বী আৰু মুখ্যমন্ত্ৰী হিচাপে ন্যায় দিবলৈ চেষ্টা কৰিছো। মই শান্তি, উন্নয়ন নিশ্চিত কৰিবলৈ আৰু ৰাজ্যখনক ক’ভিড সংকটৰ পৰা আঁতৰাই নিয়াৰ চেষ্টা কৰিছো।”
সংবাদ মাধ্যমৰ সৈতে বাৰ্তালাপ কৰি তেওঁ কয়, “সকলো বস্তুৰ এটা সময়সীমা আছে। আমি সেই সময়সীমাত কাম কৰো। মোক য’তেই পঠোৱা হয়, মুখ্যমন্ত্ৰী হওঁক বা আন কোনো পদ হওঁক, বিপ্লব দেৱ সকলো ঠাইতে খাপ খাব পাৰে।” বিপ্লব কুমাৰ দেৱে নতুন দিল্লীত কেন্দ্ৰীয় গৃহ মন্ত্ৰী অমিত শ্বাহক লগ কৰাৰ এদিন পিছতে এই পদত্যাগ কৰিছে। সূত্ৰ অনুসৰি, তেওঁৰ পদত্যাগ সন্দৰ্ভত সিদ্ধান্তটো বিজেপিৰ নেতৃত্বৰ পৰা আহিছিল।
