আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ প্ৰথম পত্নী ইভানা ট্ৰাম্পৰ ৭৩ বছৰ বয়সত মৃত্যু
ড’নাল্ড ট্ৰাম্পে কয় যে নিউয়ৰ্কত থকা নিজৰ ঘৰত ইভানা ট্ৰাম্পৰ মৃত্যু হয়। ৭৬ বছৰীয়া ড’নাল্ড ট্ৰাম্পে কয় যে তেওঁ আছিল এগৰাকী আচৰিত, ধুনীয়া আৰু অসাধাৰণ মহিলা যিয়ে এক আচৰিত আৰু প্ৰেৰণাদায়ক জীৱন যাপন কৰিছিল।
তেওঁ লগতে কয়, “তেওঁৰ গৌৰৱ আৰু আনন্দত আছিল, তেওঁৰ তিনিটা সন্তান ড’নাল্ড জুনিয়ৰ, ইভাংকা আৰু এৰিক। তেওঁ তিনিওকেলৈ গৌৰৱ কৰিছিল, যিদৰে আমি সকলোৱে তেওঁক লৈ গৌৰৱ কৰো। শান্তিৰে জিৰণি লওক ইভানা!”
চেকোস্লোভাকিয়াত কমিউনিষ্ট শাসনৰ অধীনত ডাঙৰ-দীঘল হৈছিল প্ৰাক্তন মডেল ইভানা ট্ৰাম্প। ১৯৭৭ চনত ড’নাল্ড ট্ৰাম্পৰ সৈতে বিবাহপাশত আৱদ্ধ হয়। সেই বছৰৰ শেষৰ ফালে তেওঁলোকৰ প্ৰথম সন্তান ড’নাল্ড জুনিয়ৰৰ জন্ম হয়। ১৯৮১ চনত ইভাংকা আৰু ১৯৮৪ চনত এৰিকৰ জন্ম হয়।
বৃহস্পতিবাৰে ইনষ্টাগ্ৰামত এৰিক ট্ৰাম্পে মাতৃক শ্ৰদ্ধাঞ্জলি জ্ঞাপন কৰে। পোষ্টটোত কোৱা হৈছে যে আমাৰ মাতৃ আছিল এগৰাকী অবিশ্বাস্য মহিলা – ব্যৱসায়ৰ ক্ষেত্ৰত এগৰাকী শক্তি, এগৰাকী বিশ্বমানৰ খেলুৱৈ, এগৰাকী উজ্জ্বল সৌন্দৰ্য্য আৰু এগৰাকী যত্নশীল মাতৃ আৰু বন্ধু।
