ক্ৰিকেট খেলিবলৈ পুনৰ পাকিস্তানলৈ যাব ভাৰতীয় দল। অহা বছৰ পাকিস্তানত হ’ব এছিয়া কাপ। সেই ৫০ অভাৰ খেলিবলৈ ভাৰতে বাবৰ আজমৰ দেশলৈ যাব পাৰে। ভাৰতীয় ক্ৰিকেট ব’ৰ্ডত এনে এক আলোচনা আৰম্ভ হৈছে।
ভাৰতে শেষবাৰৰ বাবে ২০০৬ চনত পাকিস্তানত দ্বিপাক্ষিক শৃংখলা খেলিছিল। দুয়োখন দেশে দুবাৰকৈ টেষ্ট আৰু এদিনীয়া শৃংখলাত খেলিছিল। ইয়াৰ পিছতে দ্বিপাক্ষিক ছিৰিজৰ পিছতো ভাৰত পাকিস্তানলৈ যোৱা নাছিল। ২০০৮ চনত এছিয়া কাপ খেলিবলৈ পাকিস্তানলৈ গৈছিল ভাৰত। সেইটোৱেই আছিল শেষবাৰৰ বাবে ভাৰত ক্ৰিকেট খেলিবলৈ পাকিস্তানলৈ যোৱা। ২০১২ চনৰ পিছত ৰাজনৈতিক কাৰণত দুয়োখন দেশৰ মাজত দ্বিপাক্ষিক শৃংখলাও বন্ধ কৰি দিয়া হৈছিল। বিশ্বকাপ, এছিয়া কাপ, চেম্পিয়নছ ট্ৰফী আদি প্ৰতিযোগিতাত দুয়োখন দেশে মুখামুখি হৈছিল। ২০২৩ চনত পাকিস্তানত অনুষ্ঠিত হ’ব এছিয়া কাপ। সেই প্ৰতিযোগিতাত খেলিবলৈ ভাৰতে পাকিস্তানলৈ যাব পাৰে। এই বিষয়ে চিন্তা কৰিবলৈ আৰম্ভ কৰিছে। অৱশ্যে ভাৰত চৰকাৰৰ পৰা অনুমতি লাভ কৰিলেহে বিৰাট বাহিনী যাব পাৰিব।
২০২৩ চনত ভাৰতত অনুষ্ঠিত হ’ব ৫০ অভাৰৰ বিশ্বকাপ। গতিকে তাৰ আগতে ব’ৰ্ডে পাকিস্তানলৈ গৈ ট্ৰেভেল ৰুট খুলিব বিচাৰিছে। এছিয়ান ক্ৰিকেট কাউন্সিলৰ উদ্যোগত এছিয়া কাপৰ আয়োজন কৰা হৈছে। যাৰ মূৰব্বী হৈছে ভাৰতীয় ব’ৰ্ডৰ সম্পাদক জয় শ্বাহ। ব’ৰ্ডৰ এজন বিষয়াই কয় যে পাকিস্তানত ভাৰতে ক্ৰিকেট খেলাটো কেন্দ্ৰীয় চৰকাৰৰ ক্লিয়াৰেন্সৰ ওপৰত নিৰ্ভৰ কৰিব।
কিন্তু ২০২৩ৰ পৰা ২০২৭ চনৰ ভিতৰত ভাৰত-পাকিস্তান দ্বিপাক্ষিক শৃংখলাৰ সম্ভাৱনা নাই। দুয়োখন দেশৰ মাজত দ্বিপাক্ষিক শৃংখলা আয়োজন কৰিবলৈ চৰকাৰী অনুমতিৰ প্ৰয়োজন। ব’ৰ্ডে ভাবে যে এতিয়া সেয়া সম্ভৱ নহয়। পাকিস্তানৰ বিৰুদ্ধে খেলিব নোৱাৰিলেও ২০২৩ৰ পৰা ২০২৭ চনৰ ভিতৰত ভাৰতে ৩৮খন টেষ্ট খেলিব। ৪২ খন এদিনীয়া মেচ আৰু ৬১ খন টি-২০ মেচ খেলিব।
