আকাশৰ মাজত চৰাইৰ খুন্দাত ক্ষতিগ্ৰস্ত আকাছা এয়াৰৰ বিমান। বিমান নিয়ন্ত্ৰক অসামৰিক বিমান পৰিবহণ সঞ্চালকালয় (ডি জি চি এ)ৰ মতে, বৃহস্পতিবাৰে পুৱা আহমেদাবাদৰ পৰা দিল্লী অভিমুখে বয়িং-৭৩৭ মেক্স-৮ বিমানত এই ঘটনা সংঘটিত হয়।
প্ৰায় ১৯০০ ফুট উচ্চতাত আকাছা এয়াৰৰ বিমান QP-1333 বিমানত খুন্দা মাৰে এটা চৰাই। ফলত বিমানখনৰ সামান্য ক্ষতিসাধন হয়। অৱতৰণ কৰাৰ কিছু সময়ৰ পূৰ্বে সংঘটিত হয় এই ঘটনা। দিল্লী বিমানবন্দৰত অৱতৰণ কৰাৰ পিছত বিমানখন পৰীক্ষা কৰি সামান্য ক্ষতিগ্ৰস্ত হোৱা বুলি জানিব পৰা গৈছে।
প্ৰসংগক্ৰমে যোৱা কেইবছৰমানৰ পৰা দেশৰ বিভিন্ন বিমানবন্দৰত বতাহত চৰাইৰ সৈতে সংঘৰ্ষৰ সংখ্যা বৃদ্ধি পোৱাৰ বাবে ডিজিচিএ চিন্তিত হৈ পৰিছে। অসামৰিক বিমান পৰিবহণ নিয়ন্ত্ৰকটোৱে যোৱা আগষ্ট মাহত বিমানবন্দৰ কৰ্তৃপক্ষক চৰাইৰ আক্ৰমণৰ পৰা হাত সাৰিবলৈ নিৰ্দেশ জাৰি কৰিছিল। ই প্ৰতিটো বিমানবন্দৰ কৰ্তৃপক্ষক চৰাই আৰু অন্যান্য বন্যপ্ৰাণী (ৰাণৱেৰ ওচৰৰ অৰণ্যত বাস কৰা শিয়াল, বনৰীয়া মেকুৰী আদি)ৰ বাবে বিপদৰ মূল্যায়ন কৰিবলৈ নিৰ্দেশ দিয়ে। ডিজিচিএই এই সন্দৰ্ভত বন্যপ্ৰাণী বিশেষজ্ঞৰ পৰামৰ্শও ল’বলৈ অনুৰোধ জনাইছে।
