‘জীৱন বচাবলৈ মাস্ক পৰিধান কৰক, কেজৰিৱাল প্ৰচাৰত ব্যস্ত’, আপক আক্ৰমণ কেন্দ্ৰীয় স্বাস্থ্যমন্ত্ৰী মানসুখ মাণ্ডব্যৰ

দিল্লীৰ বতাহ প্ৰতিদিনে বেয়া হৈ গৈ আছে। অৰবিন্দ কেজৰিৱালক আক্ৰমণ কৰি কেন্দ্ৰীয় স্বাস্থ্যমন্ত্ৰী মানসুখ মাণ্ডব্যই শুকুৰবাৰে কয় যে দিল্লীৰ মুখ্যমন্ত্ৰী গুজৰাট আৰু হিমাচল প্ৰদেশৰ নিৰ্বাচনৰ প্ৰচাৰত ব্যস্ত। গতিকে দিল্লীবাসীয়ে প্ৰদূষণৰ পৰা ৰক্ষা পাবলৈ মাস্ক পৰিধান কৰিব লাগে। বিপজ্জনক প্ৰদূষণৰ মাত্ৰা আৰু স্বাস্থ্য সতৰ্কবাণীক লৈ উদ্বিগ্ন হৈ দিল্লী চৰকাৰে শুকুৰবাৰে ঘোষণা কৰে যে শনিবাৰৰ পৰা প্ৰাথমিক বিদ্যালয় বন্ধ থাকিব আৰু চৰকাৰী কৰ্মচাৰীৰ ৫০ শতাংশই ঘৰৰ পৰাই কাম কৰিব। ইয়াৰ উপৰিও ব্যক্তিগত কাৰ্যালয়কো সেই অনুসৰি কাম কৰিবলৈ পৰামৰ্শ দিয়া হয়।

মাণ্ডব্যই টুইটযোগে কয় যে, “কেজৰিৱাল গুজৰাট আৰু হিমাচল প্ৰদেশত বিনামূলীয়া ৰেৱাৰীৰ প্ৰতিশ্ৰুতি দিয়া আৰু কৰদাতাসকলক কোটি কোটি টকা খৰচ কৰি বিজ্ঞাপন দিয়াত ব্যস্ত হৈ থকাৰ বাবে দিল্লীৰ জনসাধাৰণক মাস্ক পৰিধান কৰি বায়ু প্ৰদূষণৰ পৰা নিজকে ৰক্ষা কৰিবলৈ অনুৰোধ জনোৱা হৈছে।”

বৰ্তমান দিল্লী আৰু এনচিআৰ অঞ্চলত বায়ু প্ৰদূষণ এক বৃহৎ সমস্যাত পৰিণত হৈছে। বিগত কিছুদিন ধৰি দিল্লীত বিপুল পৰিমাণৰ ধোঁৱাৰ সৃষ্টি হৈছে। পঞ্জাৱত বায়ু প্ৰদূষণ আৰু খোলা জ্বলোৱাৰ বাবে অনুকূল ঋতুভিত্তিক বতাহৰ গতিৰ বাবে ৰাষ্ট্ৰীয় ৰাজধানী দিল্লীয়ে বিয়লি ৪ বজাত ৪৪৭ AQI ৰেকৰ্ড কৰে। হাওঁফাওঁৰ ক্ষতিকাৰক পিএম ২.৫ৰ ঘনত্ব কেইবাটাও ক্ষেত্ৰত প্ৰতি ঘনমিটাৰত ৪৭০ মাইক্ৰ’গ্ৰাম অতিক্ৰম কৰিছে। ইয়াৰ পৰিমাণ ৬০ মাইক্ৰ’গ্ৰামৰ নিৰাপদ সীমাৰ আঠগুণতকৈও অধিক।

শনিবাৰে তৃতীয় দিনাৰ বাবে দিল্লীৰ বায়ুৰ গুণাগুণ ‘গুৰুতৰ’ শিতানত আছে। কিন্তু ৰাজধানীখনৰ বায়ুৰ গুণাগুণ সূচকাংকত সামান্য উন্নতি দেখা গৈছে, যিটো বৰ্তমান ৪৩১ত আছে। শুকুৰবাৰে পুৱা ৰাজধানী চহৰখনৰ একিউআই ৪৭২ত ৰেকৰ্ড কৰা হয়। লগতে ৰাষ্ট্ৰীয় ৰাজধানী অঞ্চলৰ বিভিন্ন অঞ্চল যেনে নয়ডা আৰু গুৰুগ্ৰামত আজি পুৱা ৭ বজাত ক্ৰমে ৫২৯ আৰু ৪৭৮ AQI ৰেকৰ্ড কৰা হৈছে। এই AQI পৰিমাণ অতি বিষাক্ত আৰু ইয়াক ‘গুৰুতৰ’ বুলি বৰ্ণনা কৰা হৈছে। পশ্চিম দিল্লীৰ ধীৰপুৰত ৫৩৪ টা AQI ৰেকৰ্ড কৰা হৈছে। শুকুৰবাৰে SAFAR (System of Air Quality and Weather Forecasting and Research) য়ে প্ৰকাশ কৰা অনুসৰি দিল্লীৰ বায়ুত PM 2.5 প্ৰদূষণৰ ৩৪ শতাংশ ষ্ট্ৰ’ জ্বলোৱাৰ ফলত হয়।