ইউক্ৰেইনৰ ৰাষ্ট্ৰপতি জেলেনস্কিয়ে ৰাষ্ট্ৰসংঘত দিয়া ভাষণত ৰাছিয়াক ‘মানৱতাৰ বিৰুদ্ধে অপৰাধ’ৰ অভিযোগ উত্থাপন কৰিছে।
বুধবাৰে নিশা নিউয়ৰ্কৰ সময় অনুসৰি ভিডিঅ’ৰ জৰিয়তে ৰাষ্ট্ৰসংঘৰ নিৰাপত্তা পৰিষদক জেলেনস্কিয়ে কয় যে ৰাছিয়াৰ “আতংকৰ উৎস”ৰ বাবে লাখ লাখ লোকে বিদ্যুৎ, গৰম আৰু পানীৰ অভাৱত পৰিছে।
ইউক্ৰেইনে জনোৱা মতে, বুধবাৰৰ আক্ৰমণত এটা নৱজাত শিশুকে ধৰি কমেও ৭ জন লোকৰ মৃত্যু হৈছে।
ইয়াৰ পূৰ্বে বুধবাৰে নিশা জেলেনস্কিয়ে কয় যে কিয়েভৰ পৰিস্থিতি এতিয়াও ‘অতি কঠিন’।
তেওঁ কয় যে বিদ্যুৎ যোগান পুনৰ ঘূৰাই অনাৰ বাবে গোটেই নিশাটো প্ৰচেষ্টা অব্যাহত থাকে।
মেয়ৰ ভিটালি ক্লিচকোৱে কয় যে ৰাজধানীৰ কমেও ৮০% বাসিন্দাৰ ঘৰত বিদ্যুৎ বা পানী নাই।
কিন্তু জেলেনস্কিয়ে কয় যে ৰাছিয়াৰ ক্ষেপণাস্ত্ৰৰ দ্বাৰা আঘাতপ্ৰাপ্ত কিছুমান চহৰত শক্তি পুনৰ ঘূৰাই অনা সম্ভৱ। ইয়াৰ ভিতৰত আছে লভিভ, অডেছা আৰু চেৰকাচি।
