আজি উত্তৰ-পূবৰ নাগালেণ্ড, ত্ৰিপুৰা আৰু মেঘালয় তিনিখন ৰাজ্যত ওলাব নিৰ্বাচনৰ ফলাফল। ১৬ ফেব্ৰুৱাৰীত ত্ৰিপুৰাত আৰু ২৭ ফেব্ৰুৱাৰীত মেঘালয়-নাগালেণ্ডত ভোটগ্ৰহণ হৈছিল। তিনিওখন ৰাজ্যৰ মানুহে ফলাফলৰ বাবে অপেক্ষা কৰি আছিল যদিও সকলোৰে দৃষ্টি নাগালেণ্ডৰ ওপৰত আছিল।
১৯৬৩ চনত নাগালেণ্ড ৰাজ্য হয়, এতিয়া ৬০ বছৰ পাৰ হৈ গ’ল, ইয়াত ১৪ সংখ্যক বাৰৰ বাবে মানুহে মুখ্যমন্ত্ৰী নিৰ্বাচন কৰিছে। কিন্তু আজিলৈকে কোনো আসনৰ পৰা কোনো মহিলা বিধায়ক নিৰ্বাচিত হ’ব পৰা নাছিল। এইবাৰ এই পৰম্পৰা ভংগ হ’ল।
নেশ্যনেলিষ্ট ডেম’ক্ৰেটিক প্ৰগ্ৰেছিভ পাৰ্টিৰ হেকানী জাখালু ডিমাপুৰ তৃতীয় আসনত জয়লাভ কৰি নাগালেণ্ডৰ প্ৰথমগৰাকী মহিলা বিধায়িকা হিচাপে পৰিগণিত হৈছে। তেওঁ লোক জনশক্তি পাৰ্টিৰ এগেটো জিমোমিক ১৫৩৬ ভোটত পৰাস্ত কৰে। ৪৭ বছৰীয়া হেকানীয়ে লাভ কৰে ১৪,৩৯৫টা ভোট। তেওঁ মাত্ৰ ৭ মাহ পূৰ্বে ৰাজনীতিত প্ৰৱেশ কৰিছিল।
৬০খন বিধানসভা আসন থকা নাগালেণ্ডত ১৮৪গৰাকী প্ৰাৰ্থীয়ে নিৰ্বাচনত অংশগ্ৰহণ কৰিছিল, ইয়াৰে মাত্ৰ ৪গৰাকীহে মহিলা আছিল। এইবোৰত আটয়জু আসনৰ পৰা বিজেপিৰ কাহুলী ছেমা ৬০২টা ভোটত পৰাস্ত হয়। তেওঁ কংগ্ৰেছ দলৰ পিক্ট’ৰ হাতত পৰাস্ত হয়। চতুৰ্থগৰাকী মহিলা প্ৰাৰ্থী কংগ্ৰেছৰ ৰ’জী থমছন।
নাগালেণ্ডত মহিলা ভোটাৰৰ সংখ্যা (৪৯.৭৯%) পুৰুষৰ সমান, অৰ্থাৎ তেওঁলোকেও সমানে ভোটদান কৰাৰ পিছতো মহিলাক ৰাজনীতিত প্ৰৱেশৰ বিৰোধিতা সদায় হৈ আহিছে। আনহাতে, ৬০খন বিধানসভা আসন থকা মেঘালয়ত কেৱল সমাজতে নহয়, চৰকাৰতো মহিলাৰ প্রভাৱ যথেষ্ট৷
উত্তৰ-পূৰ্বাঞ্চলৰ মেঘালয়ত বহু জনগোষ্ঠীত মহিলাই হ’ল পৰিয়ালৰ মূৰব্বী। কন্যাই উত্তৰাধিকাৰী আৰু ল’ৰাবোৰে সম্পত্তিত কোনো অধিকাৰ নাপায়। ইয়াত মানুহে কন্যা সন্তানৰ জন্ম উদযাপন কৰে।
