শেহতীয়াকৈ গোৱাত অনুষ্ঠিত হোৱা চাংহাই সহযোগিতা সংস্থাৰ সদস্য দেশ সন্মিলনৰ আঁৰত ৰাছিয়াৰ বৈদেশিক মন্ত্ৰী চাৰ্গেই লাভৰভ আৰু ভাৰতৰ বৈদেশিক মন্ত্ৰী এছ জয়শংকৰে এক বৈঠক অনুষ্ঠিত কৰে।
ৰাছিয়াৰ ভাৰতীয় বেংকত জমা হৈছে শ শ কোটি ভাৰতীয় টকা। দেশে এই ধন তেল বিক্ৰীৰ পৰাই পাইছিল। কিন্তু এই ভাৰতীয় টকাৰ মস্কোত কোনো কাম নাই। যোৱা শুকুৰবাৰে এই কথা কয় ৰাছিয়াৰ বৈদেশিক মন্ত্ৰী চাৰ্গেই লাভৰভে।
শেহতীয়াকৈ ভাৰতৰ গোৱা ৰাজ্যত চাংহাই সহযোগিতা সংস্থাৰ সদস্য দেশসমূহৰ সন্মিলন অনুষ্ঠিত হয়। সন্মিলনৰ আঁৰত অনুষ্ঠিত এখন বৈঠকত লাভৰভে সাংবাদিকৰ আগত কয় যে আমাৰ হাতত শ শ কোটি ভাৰতীয় টকা আছে, আমি সেইবোৰ ব্যৱহাৰ কৰিব নোৱাৰো। এইটো এটা সমস্যা। আমি এই ধন ব্যৱহাৰ কৰিব লাগিব। কিন্তু ইয়াৰ বাবে এই টকাবোৰ অন্য মুদ্ৰাত বিনিময় কৰিব লাগিব। বৰ্তমান এই বিষয়ত চৰ্চা চলি আছে।
ভাৰতৰ উদ্যোগ আৰু বাণিজ্য মন্ত্ৰালয়ৰ তথ্য অনুসৰি চলিত বিত্তীয় বৰ্ষ ২০২২-২৩ৰ প্ৰথম ১১ মাহত ৰাছিয়ালৈ ভাৰতৰ ৰপ্তানি ১১.৬ শতাংশ বা ২.৮ বিলিয়ন ডলাৰ হ্ৰাস পাইছে। ইফালে আমদানি পাঁচগুণ বৃদ্ধি পাই ৪ হাজাৰ ১৫৬ মিলিয়ন ডলাৰ হৈছে।
ৰাছিয়াৰ পৰা ভাৰতৰ আমদানি বৃদ্ধিৰ মূল কাৰণ হৈছে ইন্ধন তেল। ৰাছিয়াই ইউক্ৰেইনত আক্ৰমণ চলোৱাৰ পিছতে পশ্চিমীয়া দেশসমূহে ৰাছিয়াৰ তেল ৰপ্তানি বন্ধ কৰাৰ চেষ্টা চলাইছে। এই উপলক্ষে ভাৰতে ৰাছিয়াৰ পৰা ৰেহাই মূল্যত তেল ক্ৰয় বৃদ্ধি কৰিছে।
ৰাছিয়াৰ পৰা ভাৰতৰ ইন্ধন তেল আমদানিও এক অভিলেখ গঢ়িবলৈ সক্ষম হৈছে। ভৰটেক্সা লিমিটেডৰ তথ্য অনুসৰি এপ্ৰিল মাহত ভাৰতে প্ৰতিদিনে গড়ে ১৬.৮ মিলিয়ন বেৰেল ৰাছিয়ান তেল আমদানি কৰিছিল, যিটো পূৰ্বৰ বছৰৰ ৬ গুণ।
ইউক্ৰেইনৰ ওপৰত হোৱা আক্ৰমণৰ বাবে পশ্চিমীয়া দেশসমূহে ৰাছিয়াৰ বেংক আৰু ছুইফ্টৰ লেনদেনকে ধৰি ৰাছিয়াৰ ওপৰত বিভিন্ন নিষেধাজ্ঞা আৰোপ কৰিছে আৰু মস্কো বিপদত পৰিছে। এনে পৰিস্থিতিত মস্কোৱে ভাৰতক আগতীয়াকৈ টকাৰ ব্যৱসায় কৰিবলৈ উৎসাহিত কৰিছিল।
