কংগ্ৰেছ নেতা ৰাহুল গান্ধী আৰু আম আদমি পাৰ্টিৰ মুৰব্বী অৰবিন্দ কেজৰিৱালে বৃহৎ ব্যৱসায়ী আৰু উদ্যোগপতিসকলক ঋণ ৰেহাই দিয়াৰ বাবে কেন্দ্ৰক মিছাকৈ জগৰীয়া কৰাৰ অভিযোগ উত্থাপন হৈছে। তেওঁলোকৰ বিৰুদ্ধে দিল্লী উচ্চ ন্যায়ালয়তো ৰাজহুৱা স্বাৰ্থৰ গোচৰ ৰুজু কৰা হৈছে।
উদ্যোগপতিৰ ঋণ ৰেহাই সন্দৰ্ভত কেন্দ্ৰৰ বিৰুদ্ধে মিছা আৰু বিভ্ৰান্তিকৰ বক্তব্য দিয়াৰ বাবে ৰাহুল আৰু কেজৰিৱালৰ বিৰুদ্ধে সুৰজিৎ সিং যাদৱ নামৰ এজন ব্যক্তিয়ে দাখিল কৰা জনস্বাৰ্থৰ গোচৰ বুধবাৰে দিল্লী উচ্চ ন্যায়ালয়ে মানি লয়। অহা ৭ আগষ্টত দিল্লী উচ্চ ন্যায়ালয়ৰ মুখ্য ন্যায়াধীশ সতীশ চন্দ্ৰ শৰ্মা আৰু ন্যায়াধীশ সুব্ৰহমান্যম প্ৰসাদৰ বিচাৰপীঠত শুনানি গ্ৰহণ কৰা হ’ব।
‘সমাজ কৰ্মী’ বুলি দাবী কৰা সুৰজিতৰ অধিবক্তাই অভিযোগ কৰে যে ৰাহুল আৰু কেজৰিৱালে কৰ্পৰেট সত্তাৰ কৰ ৰেহাইৰ সন্দৰ্ভত পদ্ধতিগতভাৱে ভুৱা অভিযোগ উত্থাপন কৰি দেশ চৰকাৰৰ প্ৰতি নেতিবাচক ভাবমূৰ্তি সৃষ্টি কৰাত সক্ৰিয় হৈ পৰিছে। গতিকে বিষয়টো জনস্বাৰ্থৰ সৈতে পোনপটীয়াকৈ জড়িত। দিল্লী উচ্চ ন্যায়ালয়ৰ মুখ্য ন্যায়াধীশ সতীশ চন্দ্ৰ শৰ্মাৰ বিচাৰপীঠে আবেদনকাৰীৰ অধিবক্তাক অভিযোগৰ সৈতে জড়িত প্ৰয়োজনীয় নথি দাখিল কৰিবলৈ নিৰ্দেশ দিয়ে।