তোছাখানা গোচৰত তিনি বছৰৰ কাৰাদণ্ডৰ শাস্তি পোৱাৰ কিছু সময়ৰ পাছতে শনিবাৰে লাহোৰৰ জামান পাৰ্কত থকা ঘৰৰ পৰা গ্ৰেপ্তাৰ কৰা হয় পাকিস্তানৰ প্ৰাক্তন প্ৰধানমন্ত্ৰী ইমৰাণ খানক।
গ্ৰেপ্তাৰৰ পিছত ইমৰাণক পঞ্জাৱ প্ৰদেশৰ কুখ্যাত এট’ক জেলত ভৰ্তি কৰা হয়। ই দেশৰ অন্যতম প্ৰধান সৰ্বোচ্চ নিৰাপত্তাৰক্ষী কাৰাগাৰ। উগ্ৰপন্থীকো তাত ৰখা হয়। কিন্তু ইয়াত তেওঁক অতি গুৰুত্বপূৰ্ণ ব্যক্তি বা ভিআইপি হিচাপে উন্নত কোষত ৰখা হৈছে।
জেলৰ সূত্ৰই জনোৱা মতে ইমৰাণক ৰখা ঠাইখন ভিআইপি চেল যদিও এচি নাই। কিন্তু ফেন, বিচনা, টয়লেট আৰু বাথৰুম আছে। ইমৰাণ খানৰ বাহিৰেও দেশৰ কোনো প্রাক্তন প্রধানমন্ত্রীক এই কাৰাগাৰত ৰখা হোৱা নাই৷
প্ৰাক্তন প্ৰধানমন্ত্ৰীগৰাকীক জেললৈ অনাৰ পিছতে উচ্চ নিৰাপত্তাৰক্ষী কাৰাগাৰখন শক্তিশালী কৰা হৈছে। সমৰ্থক বা আন কোনো গোটে তেওঁক মুক্ত কৰিব নোৱাৰাৰ বাবে চাৰিওফালৰ পথ অৱৰোধ কৰি ৰাখিছে। কেৱল সেয়াই নহয়, কাৰাগাৰ এলেকাৰ ঘৰৰ চাদত সাংবাদিক আৰোহণ বন্ধ কৰিবলৈ প্ৰশাসনে ঘৰৰ মালিকক নিৰ্দেশ দিছে যাতে সংবাদ মাধ্যমে কাৰাগাৰৰ ছবি আৰু ভিডিঅ’ প্ৰকাশ কৰিব নোৱাৰে।
ইফালে আমেৰিকাই মন্তব্য কৰিছে যে প্ৰাক্তন প্ৰধানমন্ত্ৰীগৰাকীক গ্ৰেপ্তাৰ কৰাটো পাকিস্তানৰ আভ্যন্তৰীণ বিষয়।
