কাশ্মীৰ বিষয়ক লৈ ভাৰতে পাকিস্তানৰ সৈতে বৈঠকত মিলিত হ’ব লাগে। নহ’লে গাজাৰ দৰে হ’ব! কাশ্মীৰৰ প্ৰাক্তন মুখ্যমন্ত্ৰী ফাৰুক আব্দুল্লাই কেন্দ্ৰীয় চৰকাৰক এইদৰে সমালোচনা কৰে।
সাংবাদিকক সম্বোধন কৰি ৰাষ্ট্ৰীয় সন্মিলনৰ মুৰব্বীগৰাকীয়ে কয়, ‘প্ৰধানমন্ত্ৰী নৰেন্দ্ৰ মোদীয়েও কয় যে যুদ্ধ কোনো সমস্যা সমাধানৰ বিকল্প নহয়। বৈঠক বা আলোচনাৰ জৰিয়তে সমাধানৰ পথত উপনীত হ’ব লাগে। পাকিস্তানৰ পৰৱৰ্তী প্ৰধানমন্ত্ৰী হ’বলৈ গৈ আছে নৱাজ শ্বৰীফ। ভাৰতৰ সৈতে আলোচনা কৰিবলৈ তেওঁলোক ইচ্ছুক। গতিকে আমি তেওঁলোকৰ লগত কথা পাতিবলৈ কিয় সাজু নহয়? কাৰণ কি।”
তেওঁ লগতে কয় যে যদি আমি আলোচনাৰ মাধ্যমেৰে সমাধানৰ দিশত নাহো তেন্তে আমি গাজাৰ দৰেই শেষ হ’ম। য’ত ইজৰাইলে বোমা বিস্ফোৰণ কৰি আছে।
প্ৰাক্তন প্ৰধানমন্ত্ৰী অটল বিহাৰী বাজপেয়ীয়ে এবাৰ কৈছিল, “আমি আমাৰ বন্ধুক সলনি কৰিব পাৰো কিন্তু আমাৰ ওচৰ-চুবুৰীয়াক নহয়।”
বিজেপিৰ জ্যেষ্ঠ নেত্ৰী হিনা ছাফী ভাটে কয়, বিজেপিয়ে কাম কৰিব জানে। ভাৰতে পাকিস্তানক প্ৰণাম নকৰে। আমি পাকিস্তানৰ সৈতে বাৰে বাৰে আলোচনা কৰি আহিছো। কিন্তু প্ৰতিবাৰেই আমাৰ পিঠিত ছুৰীৰে আঘাত কৰিছে। ভাৰতে সন্ত্ৰাসবাদৰ অন্ত পেলাব জানে। সেইটো ভৱিষ্যতে কৰা হ’ব।