দিল্লী আৰক্ষীৰ বিশেষ কোষৰ চোৰাংচোৱা ফিউজন এণ্ড ষ্ট্ৰেটেজিক অপাৰেচন (আই এফ এছ অ’) ইউনিটৰ ডেপুটি কমিছনাৰ কে পি এছ মালহোত্ৰাই জনোৱা মতে, নবীৰ সন্দৰ্ভত নুপুৰে কৰা বিতৰ্কিত মন্তব্যৰ বাবে নুপুৰৰ বিৰুদ্ধে এফ আই আৰ দাখিল কৰা হৈছে। দ্বিতীয় এফআইআৰত নবীন আৰু ছাবাকে ধৰি ৮ জন লোকৰ নাম আছে। হিন্দু মহাসভাৰ মুখপাত্ৰ পূজা শকুন পাণ্ডেও এই তালিকাত আছে। সংবাদ মাধ্যমত ধৰ্মীয় ঘৃণা প্ৰচাৰ কৰাৰ বাবে অনিল কুমাৰ মীনা, গুলজাৰ আনছাৰী আৰু আব্দুৰ ৰহমানৰ বিৰুদ্ধে এফ আই আৰ দাখিল কৰা হৈছে।
নবীৰ সন্দৰ্ভত বিতৰ্কিত মন্তব্য কৰা বিজেপিয়ে ৰাষ্ট্ৰীয় মুখপাত্ৰ নুপুৰ আৰু দিল্লীৰ নেতা নবীনক নিলম্বন কৰিছে। কিন্তু এই শাস্তিৰ প্ৰতিবাদত বিজেপি সমৰ্থকৰ এটা অংশই ইতিমধ্যে নেটত প্ৰচাৰ আৰম্ভ কৰিছে। ট্ৰেণ্ডিং হৈছে ‘নুপুৰ নবীন কো ৱাপছ লো’ৰ প্ৰচাৰ। বিজেপিৰ বহু সমৰ্থকে টুইটাৰত দলটোৰ বিৰুদ্ধে ক্ষোভ প্ৰকাশ কৰিছে। লগতে দলৰ শীৰ্ষ নেতৃত্বই নুপুৰ-নবিনৰ কাষত কিয় থিয় দিয়া নাই বুলিও প্ৰশ্ন উত্থাপন কৰে। কিন্তু কেন্দ্ৰীয় গৃহমন্ত্ৰী অমিত শ্বাহৰ মন্ত্ৰালয়ৰ নিয়ন্ত্ৰণত থকা দিল্লী আৰক্ষীৰ এই পদক্ষেপে স্পষ্ট কৰি দিছে যে আন্তঃৰাষ্ট্ৰীয় ক্ষেত্ৰত হেঁচাত পৰা নৰেন্দ্ৰ মোদী চৰকাৰে ঘৃণামূলক ভাষণৰ বিতৰ্কত “কঠোৰ স্থিতি” বজাই ৰাখিব বিচাৰিছে।
