সৰ্পদংশনৰ চিকিৎসাৰ বাবে চিকিৎসালয়ত নাই উপযুক্ত চিকিৎসা,স্বাস্থ্য বিভাগৰ গুৰুত্বহীনতাকলৈ উদ্বিগ্ন ৰাষ্ট্ৰীয় মানৱ অধিকাৰ কৰ্মী ড° শ‍ইকীয়া

নিউজ ডেস্ক,২৪ আগষ্ট : নামত চিকিৎসালয় আছে কিন্তু পৰ্যাপ্ত চিকিৎসক,নাৰ্ছ আৰু চিকিৎসাকৰ্মী আৰু প্ৰয়োজনীয় আন্তঃগাঁথনিৰ অভাৱ। ৰাজ্যৰ স্বাস্থ্য সেৱাৰ উন্নয়নৰ নামত ৰাজ্য চৰকাৰে বিভিন্ন উন্নয়নমূলক আঁচনি গ্ৰহণ কৰি ঢাক ঢোল বজাইছে যদিও কিছু গুৰুত্বপূৰ্ণ তথা স্পৰ্শকাতৰ বিষয়ত স্বাস্থ্য বিভাগ তথা ৰাজ্য চৰকাৰৰ গুৰুত্বহীনতাৰ বাবে উপযুক্ত চিকিৎসা নাপায় বহু লোকে প্ৰাণ হেৰুৱাব হোৱা বিষয়টোৱে মানৱ অধিকাৰ উলঙ্ঘন কৰিছে।

বিশেষকৈ প্ৰতি বছৰে গ্ৰীষ্মকালত অসমত বহু লোকৰ সর্প দংশনত মৃত্যু হয় যদিও অতি স্পর্শকাতৰ এই বিষয়টোৰ সন্দৰ্ভত, চৰকাৰ তথা স্বাস্থ্য বিভাগৰ উদাসীনতাক ধিক্কাৰ দিছে দেশৰ বলিষ্ঠ অন্ধবিশ্বাস বিৰোধী নেতা,টীম আন্নাৰ ৰাষ্ট্ৰীয় সদস্য ৰাষ্ট্ৰীয় পৰ্যায়ৰ বিশিষ্ট মানৱ অধিকাৰ তথা সমাজ কৰ্ম্মী ডঃ দিব্যজ্যোতি শইকীয়াই।

লখিমপুৰ আৰু কামৰূপ গ্রাম্যৰ বিভিন্ন চিকিৎসালয় পৰিদৰ্শন কৰি এই সন্দৰ্ভত ৰাষ্ট্ৰীয় পৰ্যায়ৰ অন্ধবিশ্বাসবিৰোধী নেতা তথা মানৱ অধিকাৰ কৰ্মী ড° দিব্যজ্যোতি শ‍ইকীয়াই সংবাদ মাধ্যমক কয় – আজি দেশৰ মালিক অৰ্থাৎ সাধাৰণ জনতা,ভোটাৰ, কৃষক ,বনুৱা তেওঁলোকৰেই কৰ্মচাৰী অৰ্থাৎ সেৱকৰ হাতত লাঞ্ছিত, বঞ্চিত। অসম চৰকাৰ তথা স্বাস্থ্য বিভাগে সৰ্প দংশনৰ চিকিৎসাৰ বিষয়টোক সঠিকভাৱে গুৰুত্ব তথা মনোনিবেশ নকৰি কেৱল এণ্টি-স্নেক ভেনাম বেজী যোগান ধৰিয়েই দায়িত্ব সামৰিছে ।

সর্প দংশনত আহত লোকৰ চিকিৎসাৰ বাবে চিকিৎসক-স্বাস্থ্যকৰ্মীৰ প্ৰশিক্ষণৰ ব্যৱস্থা কৰিব লাগে যদিও বিগত ৬/৭ বছৰৰ পূৰ্বে এই বিষয়ত স্বাস্থ্য বিভাগে একাংশ চিকিৎসকক মাষ্টৰ ট্ৰেইনাৰ হিচাপে প্ৰশিক্ষণ দিয়াৰ ব্যৱস্থা কৰিছিল যদিও পৰৱৰ্তী সময়ত বিষয়টোত বিশেষ গুৰুত্ব দিয়া নহল ।

এই সন্দৰ্ভত বিভিন্ন জিলাত ডঃ দিব্যজ্যোতি শইকীয়াই অনুসন্ধান কৰি জিলাসমূহত সৰ্প দংশনৰ ৰোগীৰ বাবে আছুতীয়া কক্ষ, ডাক্তৰ নাৰ্চক প্ৰশিক্ষণ দিয়া বিষয়বোৰক যে ৰাজ্য চৰকাৰে চৰম অৱহেলা কৰিছে এই বিষয়টো উন্মোচন কৰিলে। এতিয়াও সমগ্ৰ অসমৰ চিকিৎসালয় সমূহত সজাগতা বা প্ৰশিক্ষণপ্ৰাপ্ত ডাক্তৰ নাৰ্ছৰ ব্যৱস্থা কৰা নহ’ল । যাৰ বাবে কি সাপে খুটিলে বা সাপে খোটা ৰোগীক এন্টি স্নেক ভেনাম বেজী দিব পৰা হবনে নাই তাৰো সিদ্ধান্ত যি কোনো চিকিৎসকে লব নোৱাৰে ।

ইফালে চিকিৎসালয়সমূহত প্রয়োজনীয় অভিজ্ঞ চিকিৎসক , আন্তঃগাঁথনিৰ অভাৱৰ বাবে সৰ্পই দংশন কৰা লোকক চিকিৎসা কৰিব নোৱাৰে আৰু সেয়ে এখন চিকিৎসালয়ৰ পৰা অন্য এখন চিকিৎসালয়লৈ ৰেফাৰ কৰিব লগা অৱস্থা হয় । যাৰ বাবে উপযুক্ত সময়ত চিকিৎসা নোপোৱাৰ বাবে বহু লোকৰ মৃত্যু ঘটিছে। সজাগতাৰ অভাবৰ বাবেও বহু লোকে অন্ধবিশ্বাসৰ বলি হৈ বেজৰ কাষ চাপি অৱশেষত নিজৰ আত্মীয়ক হেৰুৱাব লগা লগা হৈছে। শিৱসাগৰ জিলাৰ ডিমৌৰ বাহিৰে ৰাজ্যৰ অধিকাংশ জিলাতে এই সম্পর্কীয় চিকিৎসাৰ অভাৱ দৃষ্টিগোচৰ হয়। সেয়েহে এই সম্পৰ্কে উপযুক্ত ব্যবস্থা গ্ৰহণেৰে অন্ধবিশ্বাস দূৰ কৰি সাধাৰণ লোকক জীৱন বচোৱাৰ ক্ষেত্ৰত যথোপযুক্ত ব্যৱস্থা গ্ৰহণ কৰিবৰ বাবে চৰকাৰৰ প্রতি দাবী জনাইছে ৰাষ্ট্ৰীয় পৰ্যায়ৰ বিশিষ্ট মানৱ অধিকাৰ তথা সমাজ কৰ্মী ডঃ দিব্যজ্যোতি শইকীয়াই।