বিশ্বৰ আটাইতকৈ ওখ আকাশচুম্বী ঘৰ। বিস্ময়ৰ প্ৰতীক হিচাপে উত্থান হৈছে ডুবাইৰ বুৰ্জ খলিফা। সংযুক্ত আৰব আমিৰশ্বাহীৰ অন্যতম আকৰ্ষণৰ কেন্দ্ৰবিন্দু এই উচ্চ আকাশচুম্বী ঘৰটোৰ প্ৰতি পৰ্যটকৰ উৎসাহৰ অন্ত নাই। বুৰ্জ খলিফাৰ উচ্চতা ৮২৮ মিটাৰ। বিভিন্ন মাধ্যমত প্ৰকাশিত তথ্য অনুসৰি এপাৰ্টমেণ্ট আৰু ষ্টুডিঅ’কে ধৰি মুঠ বাসগৃহৰ সংখ্যা হৈছে ৯০০। ৩৫ হাজাৰৰো অধিক লোক আছে।
সংযুক্ত আৰব আমিৰশ্বাহীৰ প্ৰাক্তন ৰাষ্ট্ৰপতি খলিফা বিন জায়েদ আল নাহিয়ানৰ নামেৰে নামকৰণ কৰা হৈছে। ইয়াৰ প্ৰথম নাম আছিল বুৰ্জ ডুবাই। পিছত ৰাষ্ট্ৰপতিৰ সন্মানত এই নাম সলনি কৰা হয়। ২০০৪ চনৰ ৬ জানুৱাৰীত বুৰ্জ খলিফা নিৰ্মাণৰ কাম আৰম্ভ হয়। বিশ্বৰ আটাইতকৈ ওখ আকাশচুম্বী ঘৰটো নিৰ্মাণ কৰিবলৈ ৫ বছৰ সময় লাগিল।
২০০৯ চনৰ ১ অক্টোবৰত বুৰ্জ খলিফা নিৰ্মাণৰ কাম সম্পূৰ্ণ হৈছিল। ইয়াক বিশ্বৰ আটাইতকৈ ওখ আকাশচুম্বী ঘৰ হিচাপে ঘোষণা কৰা হৈছে। ২০১০ চনৰ ৪ জানুৱাৰীত আনুষ্ঠানিকভাৱে উদ্বোধন কৰা হৈছিল । ১৬৩ মহলীয়া বুৰ্জ খলিফাৰ বহু অভিলেখ আছে। পৃথিৱীৰ আন কোনো বহুমহলীয়া অট্টালিকাত ইমান মহলা নাই।
কিন্তু বিশ্বৰ সৰ্বোচ্চ বহুমহলীয়া এই ঘৰটোৰ ভিতৰত কি আছে? ইয়াৰ এটা ফ্লেটৰ দাম শুনিলেও চকু কঁপালত উঠিব।
বুৰ্জ খলিফাত মুঠ চাৰিটা চুইমিং পুল আছে। এটা ৪৩ নং মহলাত, এটা ৭৬ নং মহলাত। বাকী দুটা চুইমিং পুল ‘দ্য ক্লাব’ৰ ছাদ আৰু কাষত। ‘দ্য ক্লাব’ হৈছে বুৰ্জ খলিফাৰ এটা স্বাস্থ্য কেন্দ্ৰ।
বুৰ্জ খলিফাৰ ১২৩ নং মহলাত আছে এটা পুথিভঁৰাল। যিসকলে কিতাপ পঢ়ি ভাল পায়, তেওঁলোকে ইয়াত বহি সময় কটায়। উচ্চতাস্থলীটোৰ ৪৩, ৭৬ আৰু ১২৩ নং মহলাত কাঁচেৰে আবৃত হল (স্কাই লবী) আছে। ডাঙৰ ডাঙৰ অনুষ্ঠান আয়োজন হয়।
বুৰ্জ খলিফাৰ ইনড’ৰ ‘এটম’স্ফিয়াৰ’ বিশ্বৰ অন্যতম ওখ ৰেষ্টুৰেণ্ট। ২০২১ চনলৈকে ইয়াৰ নামত আছিল সৰ্বোচ্চ ৰেষ্টুৰেণ্টৰ খিতাপ। পিছলৈ চীনৰ এখন ওখ ৰেষ্টুৰেণ্টে মুকুট দখল কৰে।
বুৰ্জ খলিফাৰ ১৪৮ নং মহলাত আছে বিশ্বৰ সৰ্বোচ্চ আউটড’ৰ পৰ্যবেক্ষণ ডেক। ৫৫৫ মিটাৰ উচ্চতাত অৱস্থিত এই ঠাইখন পৰ্যটকৰ আকৰ্ষণৰ কেন্দ্ৰবিন্দু। ডুবাই চহৰখন ইয়াৰ পৰা এখন ছবি যেন লাগিছে। বুৰ্জ খলিফাৰ পৰা ১৫৩ কিলোমিটাৰ দূৰত্বত অৱস্থিত ইৰাণৰ সাগৰ উপকূল পৰ্যটকসকলেও চাব পাৰে।
বুৰ্জ খলিফাৰ ১ম ৰ পৰা ৮ম মহলাত অৱস্থিত আৰ্মানী হোটেল। ইয়াত ১৬০টা কোঠা আছে। বুৰ্জ খলিফাৰ বাসিন্দাসকলৰ বাহিৰেও বাহিৰৰ পৰা মানুহ আহি এই হোটেলখনত থাকিব পাৰে। হোটেলখনৰ নিজা স্পা, চুইমিং পুল, লাইব্ৰেৰী আৰু জিম আছে।
বুৰ্জ খলিফাৰ নিজা দোকান, বজাৰ, শ্বপিং মল আছে। ইয়াৰ বাসিন্দাসকলে একো কিনিবলৈ ওলাই যোৱাৰ প্ৰয়োজন নাই। পৃথিৱীৰ আটাইতকৈ ওখ আকাশচুম্বী ঘৰটোত থকাটো সস্তীয়া নহয়। ইয়াত ৪ৰ পৰা ৫ বেডৰুমৰ এপাৰ্টমেণ্ট এটাৰ দাম ২ কোটি ৭ লাখ ডলাৰ।
