অসমৰ মুখ্যমন্ত্ৰী ড০ হিমন্ত বিশ্ব শৰ্মা আৰু মিজোৰামৰ মুখ্যমন্ত্ৰী জোৰামথাংগাই বৃহস্পতিবাৰে নতুন দিল্লীত এক নৈশ ভোজত মিলিত হয়।
ড° হিমন্ত বিশ্ব শৰ্মাৰ আমন্ত্ৰণ মৰ্মে জোৰামথাংগা নিশা প্ৰায় ৮ বজাত দিল্লীৰ অসম ভৱনত উপস্থিত হয় আৰু নিশা ৯.৩০ বজাত অনুষ্ঠানস্থলীৰ পৰা ওলাই গৈছিল।
দুয়োজন মুখ্যমন্ত্ৰীয়ে শুকূৰবাৰে কেন্দ্ৰীয় গৃহ মন্ত্ৰী অমিত শ্বাহক সাক্ষাৎ কৰাৰ সম্ভাৱনা আছে।
দুয়োগৰাকী মুখ্যমন্ত্ৰীৰ বৈঠকত অসমৰ কৃষি মন্ত্ৰী অতুল বৰায়ো অংশগ্ৰহণ কৰে।
এই বছৰৰ ২৬ জুলাইত দুয়োখন ৰাজ্যৰ মাজত সীমান্ত বিবাদ বৃদ্ধি পাইছিল আৰু দুয়োখন ৰাজ্যৰ নিৰাপত্তা বাহিনীৰ মাজত ভয়ংকৰ বন্দুক যুদ্ধৰ ফলত অসম আৰক্ষীৰ পাঁচজন জোৱান আৰু এজন অসামৰিক লোকৰ মৃত্যু হৈছিল। এজন আঘাতপ্ৰাপ্ত আৰক্ষীয়ে পিছত মৃত্যুবৰণ কৰে আৰু নিহত আৰক্ষীৰ মুঠ সংখ্যা ছয়জনলৈ বৃদ্ধি পায় । ঘটনাটোত কমেও ৫০ জন লোক আহত হৈছিল।
অৱশ্যে, দুয়োখন ৰাজ্যই এক যুটীয়া বিবৃতিত শান্তি বজাই ৰখাৰ বাবে আন্তঃৰাজ্যিক সীমান্তৰ বিতৰ্কিত অঞ্চলসমূহত নিৰপেক্ষ বাহিনীক টহল দিবলৈ কেন্দ্ৰৰ পদক্ষেপক আগুৱাই নিবলৈ সন্মত হৈছে।
