“ধৰ্ষণ বন্ধ কৰিব নোৱাৰিলে উপভোগ কৰা ভাল।”- কংগ্ৰেছ নেতাৰ মন্তব্যক স্মৃতি ইৰাণী, জয়া বচ্চনৰ পৰা প্ৰিয়ংকা গান্ধী ৱাদ্ৰালৈকে তীব্ৰ গৰিহণা

কৰ্ণাটকৰ কংগ্ৰেছ নেতা কে আৰ ৰমেশ কুমাৰে ক্ষমা প্ৰাৰ্থনা বিচাৰিও মুক্তি পোৱা নাই। ধৰ্ষণ সন্দৰ্ভত ৰমেশ কুমাৰে সদনৰ মজিয়াত এক বিতৰ্কিত মন্তব্য কৰিছিল। কেন্দ্ৰীয় মন্ত্ৰী স্মৃতি ইৰাণী, সমাজবাদী পাৰ্টিৰ সাংসদ জয়া বচ্চন আৰু কংগ্ৰেছ নেতা প্ৰিয়ংকা গান্ধী ভাদ্ৰাকে ধৰি সকলোৱে ৰমেশৰ মন্তব্যক তীব্ৰ গৰিহণা দিছে । আনকি নিৰ্ভয়াৰ মাতৃ আশা দেৱীয়ে কয়, “এনে জনপ্ৰতিনিধি থকাটো জনসাধাৰণৰ বাবে দুৰ্ভাগ্যজনক। ”

বহুতো বিধায়কে কালি কৰ্ণাটক বিধানসভাত কৃষকসকলে সন্মুখীন হোৱা সমস্যাৰ বিষয়ে কথা পাতিব বিচাৰিছিল। অধ্যক্ষ বিশ্বেশ্বৰ হেগড়ে কাগেৰীয়ে কৈছিল যে যদি সকলোকে ক’বলৈ অনুমতি দিয়া হয় তেন্তে তেওঁ কেনেকৈ অধিৱেশন খন চলাব? প্ৰাক্তন অধ্যক্ষ ৰমেশলৈ চাই তেওঁ কয়, “যেতিয়া মই পৰিস্থিতিটো নিয়ন্ত্ৰণ কৰিব নোৱাৰো, মই যি চলি আছে সেয়া উপভোগ কৰোঁ।” ৰমেশে লগে লগে তেতিয়া কৈছিল, “ধৰ্ষণ বন্ধ কৰিব নোৱাৰিলে উপভোগ কৰা ভাল।” তেওঁৰ মন্তব্যত অধ্যক্ষ বা আন সদস্যসকলে মন্তব্যৰ বিৰুদ্ধে প্ৰতিবাদ নকৰাকৈ সমস্বৰে হাঁহিছিল।

আজি প্ৰিয়ংকাই টুইটাৰত লিখিছে, “মই ৰমেশ কুমাৰৰ মন্তব্যক আন্তৰিকতাৰে গৰিহণা দিছো। এনে ধৰণৰ কথা কেনেকৈ উচ্চাৰণ কৰিব পাৰি । ইয়াৰ সপক্ষে কোনো যুক্তি নাই। ধৰ্ষণ এক জঘন্য অপৰাধ।” প্ৰিয়ংকাই মুখ খোলাৰ আগতে ৰমেশে টুইটাৰত লিখিছিল, “মোৰ মন্তব্যৰ বাবে সকলোৰে ওচৰত আন্তৰিকতাৰে ক্ষমা বিচাৰিছো। মই এই জঘন্য অপৰাধটো লঘূ কৰাৰ উদ্দেশ্যত নাছিলোঁ। ভৱিষ্যতে শব্দৰ বিষয়ে সাৱধান হ’ম। ”

কেন্দ্ৰীয় মহিলা আৰু শিশু কল্যাণ মন্ত্ৰী স্মৃতি ইৰাণীয়ে প্ৰিয়ংকাক সংসদত নাম নোলোৱাকৈ প্ৰত্যাহ্বান জনাইছিল। “কংগ্ৰেছ নেতৃত্বই উত্তৰ প্ৰদেশত কয়, “লড়কি হুঁ, লড় সকতি হুঁ। যদি আপোনাৰ যদি সাহস আছে, প্ৰথমে জনসাধাৰণৰ এই প্ৰতিনিধিজনক বহিষ্কাৰ কৰক।” সংসদৰ বাহিৰত জয়া বচ্চনে কয়, “এনে মানসিক ব্যক্তি বিধানসভা বা সংসদত আছে বুলি ভবাটো লজ্জাজনক!” কৰ্ণাটকৰ বিধানসভা অধ্যক্ষ বিশ্বেশ্বৰে আজি কয়, “যেতিয়া তেওঁ ক্ষমা বিচাৰিছে, বিষয়টো আৰু টানি নিব নালাগে। ” 

নিৰ্ভয়াৰ মাতৃ আশা দেৱীৰ ভাষাত, “নেতাসকলে ধৰ্ষণক কেনেদৰে উপহাস কৰে? এনে ধৰণৰ অপৰাধৰ পিছত এজনী ছোৱালীৰ জীৱন ধ্বংস হৈছিল। তেওঁলোক ৰুগীয়া মনৰ লোক। ”