UGCৰ এক গুৰুত্বপূৰ্ণ সিধান্ত ৷ বিশ্ববিদ্যালয় অনুদান আয়োগে (ইউজিচি) শেহতীয়াভাৱে ঘোষণা কৰিছে যে, শিক্ষাৰ্থীসকলে এতিয়াৰ পৰা একেলগে দুটা পূৰ্ণ-সময়ৰ শৈক্ষিক পাঠ্যক্ৰম কৰিবলৈ সক্ষম হ’ব। আয়োগে এই সন্দৰ্ভত এক নিৰ্দেশনা জাৰি কৰি ১৩ এপ্ৰিলত ইউজিচিৰ অফিচিয়েল ৱেবছাইটত মুকলি কৰিছে । আগতে, ইউজিচিৰ নিয়মাৱলীয়ে শিক্ষাৰ্থীসকলক দুটা পূৰ্ণ-সময়ৰ পাঠ্যক্ৰম কৰিবলৈ অনুমতি দিয়া নাছিল আৰু তেওঁলোকে অনলাইন/হ্ৰস্বম্যাদী/ডিপ্লোমা পাঠ্যক্ৰমৰ সৈতে কেৱল এটা পূৰ্ণ-সময়ৰ ডিগ্ৰী পাঠ্যক্ৰম কৰিব পাৰিছিল।
নিৰ্দেশনাসমূহ সমগ্ৰ দেশতে উপলব্ধ সকলো পাঠ্যক্ৰমৰ বাবে প্ৰযোজ্য হ’ব। শিক্ষাৰ্থীসকলে হয় ডিপ্লোমা কাৰ্যসূচী আৰু স্নাতক (ইউজি) ডিগ্ৰী, দুটা স্নাতকোত্তৰ পাঠ্যক্ৰম, বা দুটা স্নাতক পাঠ্যক্ৰম যুতীয়াভাৱে বাছনি কৰিব পাৰিব । যদি এজন শিক্ষাৰ্থী স্নাতকোত্তৰ ডিগ্ৰী পঢ়িবলৈ যোগ্য হয় আৰু লগতে বেলেগ ডমেইনত স্নাতক ডিগ্ৰীত নাম ভৰ্তি কৰিব বিচাৰে, তেন্তে তেওঁ একেসময়তে ইউজি আৰু পিজি ডিগ্ৰী লাভ কৰিবলৈ সক্ষম হ’ব। দুয়োটা কাৰ্যসূচীৰ শ্ৰেণীৰ সময়ক লৈ খেলিমেলি হ’ব নালাগিব ।
“৩১ মাৰ্চত অনুষ্ঠিত অন্তিম আয়োগৰ বৈঠকত, নিৰ্দেশনা জাৰী কৰাৰ সিদ্ধান্ত লোৱা হৈছিল যিয়ে শিক্ষাৰ্থীসকলক একেলগে দুটা শৈক্ষিক কাৰ্যসূচী অনুসৰণ কৰিবলৈ সক্ষম কৰিব ৷ কিয়নো এনইপি ২০২০-এ আনুষ্ঠানিক আৰু অনানুষ্ঠানিক শিক্ষা প্ৰপত্ৰ দুয়োটা অন্তৰ্ভুক্ত কৰি শিকাৰ বাবে একাধিক পথ ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰে ৷
নতুন নিৰ্দেশনা অনুসৰণ কৰি, শিক্ষাৰ্থীসকলে বিজ্ঞান, সামাজিক বিজ্ঞান, কলা, আৰু বিভিন্ন ধৰণৰ শাখাৰ দৰে ক্ষেত্ৰত দুটা ডিগ্ৰীৰ পাঠ্যক্ৰম কৰিবলৈ সক্ষম হ’ব। এই নিৰ্দেশনাবোৰ গ্ৰহণ কৰাটো বিশ্ববিদ্যালয়সমূহৰ বাবে বৈকল্পিক আৰু বিশ্ববিদ্যালয়সমূহৰ আইনী সংস্থাসমূহৰ অনুমোদনৰ পিছতহে কাৰ্যকৰী কৰিব পৰা যাব । প্ৰতিটো কাৰ্যসূচীৰ বাবে যোগ্যতাৰ চৰ্ত অপৰিৱৰ্তিত থাকিব আৰু বৰ্তমানৰ ইউজিচি, বিশ্ববিদ্যালয়ৰ নিয়মৰ ওপৰত আধাৰিত কৰি নামভৰ্তি কৰা হ’ব।
