অতি শীঘ্ৰেই হয়তো আপুনি চিৰদিনলৈ খাবলৈ নাপাব আমাৰ সোৱাদ লগা থলুৱা গাহৰি মাংসৰ জুতি ৷ হয়তো পেটত গামোচা বান্ধিব লাগিব দেশৰ গাহৰি পালক সকলে ৷ উত্তৰ-পূবৰ ক্ষুদ্ৰ ক্ষুদ্ৰ বৰাহ পালকসকলে ইমানদিনে যুঁজি আহিব লগা হৈ আহিছিল আপেক্ষিকভাৱে শক্তিশালী দেশৰ আন ৰাজ্যৰ গাহৰিৰ ব্যৱসায়ী সকলৰ সৈতে ৷ কিন্তু সমগ্ৰ দেশৰে বৰাহ পালক আৰু ব্যৱসায়ী সকলে অস্তিত্বৰ বাবে যুঁজিব লাগিব আমেকিকাৰ বৃহৎ আন্তঃৰাষ্ট্ৰীয় প্ৰতিষ্ঠানৰ গাহৰি ব্যৱসায়ৰ সৈতে ৷
প্ৰথম বাৰৰ বাবে কেন্দ্ৰই আমেৰিকা যুক্তৰাষ্ট্ৰক গাহৰিৰ মাংস আৰু ইয়াৰপৰা উৎপাদনজাত সামগ্ৰী ভাৰতলৈ ৰপ্তানি কৰিবলৈ শেহতীয়াভাৱে সন্মতি প্ৰদান কৰিছে। আমেৰিকা যুক্তৰাষ্ট্ৰৰ বাণিজ্য প্ৰতিনিধি কেথেৰিন টায়ে মঙলবাৰে ভাৰতৰ সৈতে কৰা চুক্তিৰ কথা সদৰি কৰাত দেশৰ গাহৰি পালনৰ সৈতে জড়িত ব্যৱসায়ীসকল ক্ষোভত তৎপৰ হৈ পৰে। তেওঁলোকে কয় যে, বিভিন্ন ৰাজ্যৰ বহু সংখ্যক লোক এই ক্ষেত্ৰত জড়িত হৈ আছে। বহুলোকে, বিশেষকৈ উত্তৰ-পূবৰ ৰাজ্যবোৰত, ঘৰে ঘৰে গাহৰি পালন কৰে। পশ্চিম বংগ, ঝাৰখণ্ড আৰু ছত্তীশগড়ৰ লোকোএই গাহৰি ব্যৱসায়ত জড়িত হৈ আছে। তেওঁলোকৰ বাবে আমেৰিকাৰ সৈতে মোকাবিলা কৰা সম্ভৱ নহ’ব। নৰ্থ-ইষ্ট প্ৰগ্ৰেছিভ পিগ ফাৰ্মাৰ্ছ এছ’চিয়েশ্যনৰ সভাপতি মনোজ বসুমতাৰীয়ে দাবী কৰে যে এই সিদ্ধান্তই গাহৰি ৰক্ষণাবেক্ষণ আৰু সম্পৰ্কিত ব্যৱসায়ৰ সৈতে জড়িত লোকসকলৰ ওপৰত বিৰূপ প্ৰভাৱ পেলাব। সংশ্লিষ্ট মহলসমূহে বিশ্বাস কৰে যে এই খং মোডী চৰকাৰৰ বাবেও মূৰৰ বিষ হ’ব পাৰে ।
অৱশ্যে, বুধবাৰৰ দিনটোত ভাৰতৰ পৰা আমেৰিকালৈ আম আৰু বেদানা ৰপ্তানি মুকলি হৈছে। ৰপ্তানি মাৰ্চৰ পৰা আলফনচো আমৰ সৈতে আৰম্ভ হ’ব। কৃষি আৰু সংসাধিত খাদ্য সামগ্ৰী বিশেষজ্ঞ উন্নয়ন পৰিষদৰ মতে, ই পশ্চিম বংগ, বিহাৰ আৰু উত্তৰ প্ৰদেশলৈ চৌচা, লাংৰা, দশেৰী, ফজলী আৰু অন্যান্য প্ৰকাৰৰ আম ৰপ্তানি কৰাত সহায় কৰিব।
ভাৰতে গাহৰিৰ মাংসৰ উপৰিও পশুখাদ্য হিচাপে ব্যৱহৃত আলফালফা উদ্ভিদ আৰু চেৰী আমদানি কৰিব। ভাৰতৰ বাণিজ্য মন্ত্ৰালয়ে এই সন্দৰ্ভত আমেৰিকা যুক্তৰাষ্ট্ৰৰ কৃষি বিভাগৰ সৈতে এক চুক্তি স্বাক্ষৰ কৰিছে।
আগতে ভাৰতে আমেৰিকালৈ আম ৰপ্তানি কৰিছিল। কিন্তু ২০২০ চনৰ পৰা, কৰ’নাৰ বাবে আমেৰিকা যুক্তৰাষ্ট্ৰৰ প্ৰতিনিধিসকলে লেনদেন চুক্তি নৱীকৰণ কৰিবলৈ দেশলৈ আহিব পৰা নাই। দুয়োপক্ষই যোৱা বছৰৰ ২৩ নৱেম্বৰত বাধাবোৰ আঁতৰ কৰাৰ পিছত কৃষিজাত সামগ্ৰীৰ আমদানি আৰু ৰপ্তানি পুনৰ আৰম্ভ কৰাৰ বাবে এক চুক্তি চূড়ান্ত কৰিছিল। বাণিজ্য মন্ত্ৰালয়ে কয় যে ভাৰতে ২০১৭-১৮ বৰ্ষত আমেৰিকালৈ ৮০০ টন আম ৰপ্তানি কৰিছিল। যাৰ বিত্তীয় মূল্য $২৭.৫ নিযুত কোটি। পৰৱৰ্তী দুবছৰত, ই ক্ৰমান্বয়ে ৯৫১ টন (৩৬.৩ নিযুত ডলাৰ) আৰু ১০৯৫ টন (৪৩.৫ নিযুত ডলাৰ) লৈ বৃদ্ধি হয়।
কিন্তু ভাৰতত থকা গাহৰিৰ বজাৰখনলৈ আমেৰিকাক দলিছা পাৰি দিয়া ঘটনাই যে অজস্ৰজনৰ পেটত গোৰ সোধা সেয়া নিশ্চিত ৷
