শুকুৰবাৰে ৰাষ্ট্ৰসংঘৰ সচিব প্ৰধান আৰু নিৰাপত্তা পৰিষদে মস্কোৰ বাহিৰৰ এটা কনচাৰ্ট হলত হোৱা মাৰাত্মক বন্দুকৰ আক্ৰমণক “তীব্ৰভাৱে” গৰিহণা দিয়ে আৰু “সন্ত্রাসবাদী” আক্ৰমণত নিহতসকলৰ পৰিয়াললৈ গভীৰ শোক প্ৰকাশ কৰে।
ৰাষ্ট্ৰসংঘৰ মুৰব্বী এণ্টনিঅ’ গুটেৰেছে মস্কোৰ বাহিৰৰ কনচাৰ্ট হলত আজি সংঘটিত হোৱা সন্ত্ৰাসবাদী আক্ৰমণক সম্ভৱপৰ কঠোৰ ভাষাৰে গৰিহণা দিয়ে, য’ত কমেও ৯৩ জন লোকৰ মৃত্যু হয় আৰু ১০০ৰো অধিক লোক আহত হয় বুলি ৰাষ্ট্ৰসংঘৰ মুখপাত্ৰ ফাৰহান হকে এক বিবৃতিত প্ৰকাশ কৰিছে।
ৰাছিয়াৰ চৰকাৰী নাম উল্লেখ কৰি বিবৃতিটোত লগতে কোৱা হৈছে যে গুটেৰেছে শোকসন্তপ্ত পৰিয়াল আৰু জনসাধাৰণৰ প্ৰতি আৰু ৰাছিয়ান ফেডাৰেচন চৰকাৰৰ প্ৰতি গভীৰ সমবেদনা জ্ঞাপন কৰিছে।
নিৰাপত্তা পৰিষদে এই কাণ্ডক লৈ শোক প্ৰকাশ কৰে আৰু এই নিন্দনীয় কাৰ্য্যৰ দোষী আৰু সুবিধা প্ৰদানকাৰীক জবাবদিহি কৰা আৰু ন্যায়ৰ ওচৰলৈ অনাৰ ক্ষেত্ৰত ৰাছিয়ান ফেডাৰেচন চৰকাৰৰ লগতে অন্যান্য সকলো সংশ্লিষ্ট কৰ্তৃপক্ষৰ সৈতে সক্ৰিয়ভাৱে সহযোগিতা আগবঢ়াবলৈ “সকলো ৰাষ্ট্ৰক” আহ্বান জনায় ।
তেওঁলোকৰ বিবৃতিত কোৱা হৈছে যে নিৰাপত্তা পৰিষদৰ সদস্যসকলে এই জঘন্য আৰু কাপুৰুষ সন্ত্ৰাসবাদী আক্ৰমণক তীব্ৰ গৰিহণা দিছে।
শুকুৰবাৰে ইছলামিক ষ্টেট গোটটোৱে এই আক্ৰমণৰ দায়িত্ব স্বীকাৰ কৰি টেলিগ্ৰামৰ জৰিয়তে এক বিবৃতিত কয় যে মস্কোৰ বাহিৰৰ অঞ্চলত অনুষ্ঠিত বৃহৎ সমাৱেশত আক্ৰমণ চলাই তেওঁলোকৰ যোদ্ধাসকলে নিৰাপদে নিজৰ ঘাটিলৈ উভতি আহিছে।
